दूरीकरोति दुरितं...

सुभाषितम्

दूरीकरोति दुरितं विमलीकरोति
चेतश्चिरन्तनमघं चुलुकीकरोति ।
भूतेषु किञ्च करुणां बहुलीकरोति
सत्सङ्गतिः कथय किं न करोति पुंसाम् ॥

सु.भा. - सत्सङ्गतिप्रशंसा (९१/३०)

dūrīkaroti duritaṃ vimalīkaroti
cetaścirantanamaghaṃ culukīkaroti ।
bhūteṣu kiñca karuṇāṃ bahulīkaroti
satsaṅgatiḥ kathaya kiṃ na karoti puṃsām ॥

पदच्छेदः

दूरीकरोति, दुरितं। विमलीकरोति, चेतः, चिरन्तनम्, अघं, चुलुकीकरोति, भूतेषु, किञ्च, करुणां, बहुलीकरोति, सत्सङ्गतिः, कथय, किं, न, करोति, पुंसाम् ॥

तात्पर्यम्

लोके सर्वेषां जनानां स्नेहिताः भवन्ति एव । तेषु स्नेहितेषु सज्जनानां संख्या तु न्यूना एव । यतः स्वार्थपराः एव अधिकाः सन्ति लोके । तथापि अस्माभिः सज्जनानां सहवासः एव करणीयः इति वदन् सुभाषितकारः तत्र कारणमपि वदति - सज्जनानां सहवासेन पुरुषाणां मनसि स्थिताः दुष्टाः विचाराः दूरं गच्छन्ति । मनः शुद्धं भवति । पुरा कृतं पापमपि भस्म भवति । अपि च प्राणिनां विषये दया अधिका भवति । अतः सज्जनानां स्नेहः मनुष्याणां किं वा न करोति ? अर्थात् सर्वविधानि मङ्गलानि अपि जनयति ।

आङ्ग्लार्थः

The evil thoughts in the minds of men are removed by the company of gentlemen. The mind becomes pure. All past sins are burnt away. Kindness also increases in animals. So why not be friends with gentlemen? Meaning all types of good things will happen to them.