पश्यत विमले...

पश्यत विमले पक्षिगणान्
मृदुलसुशोभनपक्षधरान् ।
चातकसारसकाककपोत-
मयूरगणा इह नन्दन्ति ।।

मधुरं गायति कोकिलको रुचिरं नृत्यति बर्हिणः ।
सकुतूहलमिह पश्यति सर्वं का का कुर्वन् वायसः ।।

हरि ओं ! कथयति कादम्बो डूं डूं विलपति दात्यूहः ।
टुं टुं शब्दं कृत्वा गच्छति दार्वाघाटो रुचिराङ्गः ।।

गच्छति कुहरे कञ्जनः पृच्छति कुशलं खञ्जनः ।
कम्पितशीर्षशरारिर्गच्छति क्वा क्वा कुर्वन् कासारम् ।।

ध्यानं कुरुते बकराजो मौनं भजते शुकराजः ।
गगनं प्रति गतिवेगं कुर्वन् डयते गरुडः खगराजः ।।

सरसि सरति खलु सारसो मनसि वसति किल सारङ्गी ।
उषसि विहायसि सखिजनसहिता विविधविहङ्गा विहरन्ति ।।

केचन मधुरं विलपन्ति ह्यन्ये नितरां विलसन्ति ।
कलपिलकलकलबहुविधनिनदैः तोषितमित्थं मम चित्तम् ।।

- को. रणजित्