उपजाति:
उपजाति:
एरण्डधत्तूरकरञ्जवृक्षा:पदे पदे सन्ति न गन्धसारा:।
रजोऽभिभूताश्च तमोऽभिभूता: सर्वत्र लब्धा न च पुण्यसारा:॥
ऐन्द्रं पदं भानुसमं च तेजो धनं धनाध्यक्षधनातिशायि।
आकल्पमायुश्च तथापि चित्तं न चेद् हरौ हन्त हतं समस्तम्॥
करारविन्देन पदारविन्दं मुखारविन्दे विनिवेशयन्तम्।
वटस्य पत्रस्य पुटे शयानं बालं मुकुन्दं मनसा स्मरामि॥
कायेन वाचा मनसेन्द्रियैर्वा बुद्ध्यात्मना वा प्रकृते: स्वभावात्।
करोमि यद्यत् सकलं परस्मै नारायणायेति समर्पयामि॥
झङ्कारनादेन च पूरयन्ती जगत्समस्तं मधुनादवीणया।
देवी सदा सा रसनाग्रदेशे वसेच्च सिञ्चेच्च सुधां वचस्सु॥
टङ्कारमात्रेण विशोषयेत् त्वां स राघव: प्रार्थयते ससान्त्वम्।
कातर्यभावो न च सागरायं स्वाभाविकार्यत्वमिदं रघूणाम्॥
नमोऽस्तु ते व्यास विशालबुद्धे फुल्लारविन्दायतपत्रनेत्र ।येन त्वया भारततैलपूर्ण: प्रज्वालितो ज्ञानमय: प्रदीप:॥
भोगा न भुक्ता वयमेव भुक्ता: तपो न तप्तं वयमेव तप्ता:।
कालो न यातो वयमेव याता: तृष्णा न जीर्णा वयमेव जीर्णा:॥
शब्दस्तु नाभिप्रभवोऽतिसूक्ष्म: स एव हृद्देशमभिप्रयाति । कण्ठं तत: प्राप्य मुखं ततश्च मुखाद्बहिर्याति स वैखरीति॥
षड्दर्शनं सूक्ष्मधिया विलोकितं जटाघनान्ता: पठिताश्च वेदा:।
पुराणग्रन्था: सकला: समीक्षिता: त्वद्भक्तिशून्यं विफलं समस्तम्॥